Powěsće: wutoru, 07.05.2024
Hauptinhalt
07. róžownika 2024, 08:47 hodź.
Budyšin: 1020. Budyske nalěćo
Posledni kónc tydźenja w meji wočakuje Budyšin tysacy hosći na 1020. Budyske nalěćo. Organizatorojo su mnohostronski program zestajeli, z hudźbu za wšě generacije na wjacorych jewišćach. Mjez wjace hač 40 hudźbnikami a skupinami su tež Chróšćanscy muzikanća, dujerska kapała Horjany, skupina Madstep, Serbski ludowy ansambl a Łužičanka. Sobotu, 25. meje, je na Budyskim nalěću prěni króć po 2019 tež zaso Dźeń towarstwow. Tam so wjace hač 30 towarstwow z města předstaji.
Kulow: Wólby we wosadźe
W Kulowskej wosadźe su zašły kónc tydźenja nowych čłonow za cyrkwinske předstejićerstwo a farsku radu wolili. Wuslědki je wosada na swojej stronje w interneće wozjewiła. Do noweho cyrkwinskeho předstejićerstwa słušeja Beno Mróz, Olaf Wiedemann, Roland Exner a Saskia Šimanowa. Nimo toho su wosadni wosom wosobow do farskeje rady wolili. Mjeztym, zo so farska rada wo wosadne žiwjenje sobu stara, je cyrkwinske předstejićerstwo za zarjadniske naležnosće wosady sobu zamołwite.
Čorny Chołmc: Proby dźiwadła zahajili
W Čornym Chołmcu su póndźelu proby za lětušu hru "Saga wo Krabaće" zahajili. Profesionelni dźiwadźelnicy startowachu z koncepciskimi a čitanskimi probami. Prěnju probu ze wšěmi - potajkim tež z lajskimi dźiwadźelnikami - změja potom přichodnu sobotu. Předstajenja w Čornym Chołmcu budu wot 19. junija hač do 7. julija.
Choćebuz: Přihotuja byrgarske radijo
W Choćebuzu přihotuja swobodne wobydlerske radijo. W nim chcedźa so lokalnym delnjołužiskim temam wěnować, kotrež so w powšitkownych medijach tak husto njejewja, mjez druhim tež Serbam. Wo tym rozprawja RBB. Hdy wusyłać započnu, njeje hišće jasne, tuchwilu załoža nošerske towarstwo. Wusyłać chcedźa potom na DAB-frekwency radijoweho kombinata Braniborska. Hižo w januarje su testowe wusyłanje produkowali a wusyłali.
Wóslink: Ponowja cyrkej
W cyrkwi we Wóslinku zahaja so w přichodnych tydźenjach wobšěrne twarske dźěła. Tole zdźěli tamniša ewangelska wosada. Ponowić ma so mjez druhim wonkowny wobmjetk wěže. Časnik na wěži kaž tež wjacore dodźeržane drjewjane hrjady znutřka cyrkwje dyrbja so wuměnić a historiske drjewjane wokna ponowić. Cyłkownje płaći saněrowanje něhdźe 340.000 eurow. Nimale třećina z toho ma přińć z programa LEADER, zbytk chce ewangelsko-lutherska krajna cyrkej Sakskeje zwjesć. Wosada sama ma 55.000 eurow přinošować.
