Powěsće Serbskeho rozhłosa
Hauptinhalt
08. róžownika 2024, 23:36 hodź.
Wěra: 152 ministrantow a ministrantkow do Roma
Za lětušu jězbu ministrantow do Roma su wšitke městna wobsadźene. Kaž zdźěli referentka za dźěći, Sabina Lanzyna wot Don Boscoweho domu, je so dohromady 152 ministrantow a ministrantkow přizjewiło. Kaž Lanzyna dale informuje, maja tež dosć přewodnikow. Tući dóstanu w přichodźe mjez druhim hišće prewenciske dalekubłanje. Lětuša jězba ministrantow do Roma přewjedźe so wot 28. julija do 3. awgusta.
Kamjenc: Zaryw za nowy wodowód
We wodarni w Kamjencu su wutoru ze symboliskim zarywom nowotwar wodowoda mjez Kamjencom-Jěžowom a Skaskowom zahajili. Projekt so z wjace hač dźesać milionami eurow ze strukturneje změny spěchuje. Přizwolenje přepoda wutoru sakski minister za regionalne wuwiće Thomas Schmidt. Energijowy a wodowy zawod EWAG planuje w přichodnych lětach něhdźe 20 kilometrow nowe wodowody kłasć. Z tym maja so města a gmejny wokoło Kamjenca wot zastaranja z wodu z brunicowych jamow njewotwisne stać.
Konjecy/Šunow: Wjesna kapałka wobsteji 100 lět
W Konjecach/Šunowje zhladuja lětsa na 100-lětne wobstaće tamnišeje kapałki. K wjesnemu swjedźenjej, kiž wotměje so posledni kónc tydźenja meje, planuja wjesnjenjo a wjesnjanki tež zhromadne kemše. Wjesny swjedźeń organizuja tamniša wohnjowa wobora, blidotenisowe towarstwo, młodźinski klub a Domowinska skupina Konjecy/Šunow. Tam předstaji so mjez druhim tež Wojerske towarstwo 1885 Konjecy.
Łaz: Z posedźenja gmejnskeje rady
Přetwar depota za dobrowólnu wohnjowu woboru w Šćeńcy we Łazowskej gmejnje je nimale hotowy. To zdźěli wjesnjanosta Thomas Leberecht wutoru na posedźenju Łazowskeje gmejnskeje rady. Dale dóstanu wobornicy nowe hašenske awto, kiž ma so spočatk junija přepodać. Potom ma tež depot dotwarjeny być. Tuchwilu so hišće poslednje dźěła wonka a nutřka přewjedu.
Budyšin: Sprjewina kupjel pozdźišo wotewri
Sprjewina kupjel w Budyšinje wotewri lětsa hakle spočatk šulskich prózdnin - a to 20. junija. Přičina je, zo pobrachuje personal. To zdźěli Budyska wobdźělenska a wobhospodarjenska towaršnosć BBB. Zdobom so Röhrscheidtowa kupjel spočatk lěćnych prózdnin zawrěje, lěćneje přestawki dla. Z tym hodźi so tamniši personal w Sprjewinej kupjeli zasadźić. Najebać toho pyta BBB dalši personal, wuchowanskich płuwarjow a fachowcow za kupjele.
